12-11-2007 రాత్రి టి.వి.9 లో బద్రి ప్రెజెంటర్ గా గుంటూరు యన్.టి.ఆర్ మానస సరోవరం పార్కులో ప్రేమికుల ప్రవర్తనపై కార్యక్రమం ప్రసారం అయ్యింది. అక్కడి పార్కులో జంటల కౌగలింతలు, పెదవులు కలుపుతూ ముద్దులూ బ్యాక్ గ్రౌండ్ మ్యూజిక్ పెట్టి , గ్రాఫిక్స్ జత పరిచి  8 సార్లు అవే దృశ్యాలని పదే పదే ప్రదర్శించారు.

పైపెచ్చు కార్యక్రమం లో ఇలాంటి కార్యకలపాలని చూడటాన్ని “వాయెరిజం ” అనే ఒక మనోవైకల్యంగా  పేర్కొన్నారు. మరి ఇలాంటి దృశ్యాలని  కనీసం మసక పర్చడం లాంటివైనా చేయకుండా అదే పనిగా పదే పదే చూపించే టి.వి.9 ధోరణి ని యేమనాలి?

12-11-2007 రాత్రి “మూవీస్ & మస్తీ ” కార్యక్రమం పేరిట  టి.వి.5 లో మితిమీరిన శృంగార దృశ్యాలు కలిగిన ఆంగ్ల చిత్రం క్లిప్పింగులని చూపించడమే కాక “రేపు మళ్ళి  ఇంకా హాట్ కబుర్లతో ఇక్కడే కలుద్దాం” అని  మహిళా యాంకర్తో చెప్పించడం  ….

టి.వి.9  ట్యాగు లైను “మరింత మెరుగైన సమాజం కోసం” 

- అలాంటి శృంగార దృశ్యాలని తెలివిగా వాడుకునే చవకబారు ఎత్తుగడలతో వ్యూయర్షిప్ పెంచుకునే ప్రయత్నాల వల్ల “మెరుగైన సమాజం”  వస్తుందా?.

టి.వి. 5 వాళ్ళు అంటూ ఉంటారు “ఆల్వేస్ ఎహెడ్” అని

- అందరికన్నా ముందుండాలంటే ఇంతకన్నా మార్గాలు కనిపించడంలేదా మీకు?

ఇంకా ఎన్నో ఉన్నాయి చెప్పుకోవాలంటే . వ్యాపారం కోసం మరీ ఇంత నీతి బాహ్యంగా వ్యవహరిస్తూ పైపెచ్చు సమాజానికి రక్షగా నిలుస్తున్నామని నమ్మించే ప్రయత్నం చేస్తున్న టి.వి చానళ్ళ ఆగడాలకి అడ్డుకట్ట వెయ్యకపోతే సమాజం నాశనం అవ్వడానికి ఎంతో కాలం పట్టదు. 

తిరిగి ఆశించేది ప్రేమ ఎలా అవుతుందో నాకు అర్థం కాదు. అదేం అప్పు కాదు. ఇస్తే తిరిగివ్వాలనడానికి.

వ్యామోహమే ప్రేమ అనేది సినిమా సిద్దాంతం కానీ వాస్తవం కాదు..

ప్రేమ(?) లో ఒక సిరీస్ ఆఫ్ ఏక్టివిటీస్ నిర్ధారించే సినిమాలు, సీరియళ్ళు… వాటిని అనుకరించే ప్రయత్నంలో పాట్లు, ఫీట్లూ ……

ప్రేమ తప్పు కాదు. కానీ, నానా వికారాలూ ప్రేమే అని డిసైడ్ చేసేస్కుని మిగతా వారిని ఇబ్బంది పెట్టడమే తప్పు.

మనం ప్రేమించేవారి సుఖ సంతోషాలు కోరుకోవడం తో బాటు వారికి అవి అందేలా ప్రయత్నం  చేయడంలో ప్రేమ ఉంటుంది.

 ప్రేమ అత్యంత సున్నితమైనదే కాక శక్తివంతమైన ప్రభావపూరితం కూడా. నిజమైన ప్రేమ అద్భుతాల్ని చేయిస్తుంది. అణువణువునా పరమాణు శక్తిని నింపుతుంది. దానికి ఇచ్చే శక్తి ఉంటుంది కానీ కోరుకునే తాపత్రయం ఉండదు.

అలాంటి ప్రేమ ఉదయించినప్పుడు మనకన్నా అదృష్టవంతులు ఇంకెవరూ ఉండరు. అది తెలుగు తెర సినిమా ప్రేమల కన్నా లక్ష రెట్లు గొప్పదని నిశ్చయంగా చెప్పచ్చు. 

ప్రేమ కలిగినప్పుడు నిరభ్యంతరంగా ప్రేమించండి. చెప్పాలనుకుంటే చెప్పండి. కానీ ఒక్కటే… తిరిగి ఆశించద్దు. అవతలి వాళ్ళూ మనల్ని ప్రేమిస్తే బానే ఉంటుంది కానీ ప్రేమించి తీరాలన్న రూలు లేదు. ఎదుటి వారు తిరస్కరించినా ఆ నిర్ణయాన్ని ప్రేమించడంలోనే అసలైన ప్రేమ నిండి ఉంటుంది.